« Óttarr Proppé um stefnuræðu forsætisráðherra
Björt Ólafsdóttir um stefnuræðu forsætisráðherra »

Theodóra S. Þorsteinsdóttir um stefnuræðu forsætisræðaherra

Birt þann 24.01.17

Virðulegi forseti, góðir landsmenn.

Ég ætla að leyfa mér að vera bjartsýn í þessum ræðustól í dag. Ég vil koma til starfa hér á Alþingi með trú og von um góðan árangur.  Von um gott samstarf við allt það fólk sem þjóðin valdi til ábyrgðar.

Flestir flokkar töluðu um breytt vinnubrögð í aðdraganda kosninga og að traust þyrfti að ríkja um störf helstu lykilstofnana og fyrirtækja samfélagsins. Vantraust hefur ríkt um margar þeirra og uppgjöri efnahagshrunsins er ekki lokið. Við erum enn að endurskoða ákvarðanir, aðgerðir og eftir atvikum aðgerðarleysi sem hafði mikil áhrif á líf einstaklinga hérlendis.

Skuldastaða margra fyrirtækja og heimila stökkbreyttist. Fólk hætti allt í einu að vera LÁNTAKENDUR og viðskiptavinir banka í það að vera SKULDARAR með greiðsluvanda.

Sumir fengu leiðréttingu án mikillar fyrirhafnar en aðrir gátu ekki eða höfðu ekki efni á að verjast og misstu mikið.  Sumt af því verður aldrei bætt.

Það sem hægt er að bæta er hins vegar margt og vinnubrögð stjórnmálanna er eitt þeirra.

Nú er nefnilega tækifæri til að láta verkin tala og standa við stóru orðin. Okkur verður að auðnast að yfirvinna aðferðarfræði gömlu stjórnmálanna, þar sem hagsmunir stjórnmálaFLOKKA, einstakra stjórnmálaMANNA eða vildarvina þeirra voru teknir fram yfir hagsmuni heildarinnar.

Hér í þinginu verður okkur að auðnast að vinna saman sem ein heild um málefni og hagsmuni almennings en hrökkva ekki strax í skotgrafir sem snúast um kreppta hnefa, gífuryrði og að slá pólitískar keilur.

Umbjóðendur okkar hafa engan áhuga á að við stöndum hér inni og berjum okkur á brjóst yfir að hafa unnið slag sem snerist um völd. Þeir vilja sjá okkur leysa verkefnin sem blasa við og gera það vel.

Nú er tækifæri til að skapa fyrirmyndarlandið sem forsvarsmönnum sumra stjórnamálaflokka hefur verið tíðrætt um. Nú er tækifæri til að þingmenn allra flokka sýni þá samstöðu sem þjóðin kallar eftir. Nú er tækifæri til að allir flokkar starfi í anda umbóta og sátta.

Virðulegur forseti.

Ríkisstjórn Sjálfstæðisflokks, Viðreisnar og Bjartrar framtíðar leggur hér af stað með verðug markmið um uppbyggingu grunnþjónustu og samfélagslegra innviða.

Ég ber þá von í brjósti að við náum sátt um að móta skýrar stefnur í mikilvægum málaflokkum eins og t.d. í heilbrigðisþjónustu, menntamálum, ferðamálum, umhverfismálum og útlendingamálum.

Að við náum að snúa við þeirri þróun að hér sé eilíft verið að bregðast við vanda eftir að hann kemur upp. Við eigum að vera fyrri til og vera viðbúin þegar vandinn kemur upp. Best væri  ef við gætum komið í veg fyrir hann.

Við gerum það ekki öðruvísi en með því að skoða stöðu okkar og rýna inn í framtíðina. Vinna eftir skýrri stefnumörkun sem allir hafa komið að. Við eigum að greina viðfangsefnið, skilgreina þjónustuna, setja okkur markmið og búa til leiðir.  Saman.

Í mínum huga eru þingmenn og stjórnmálaflokkar ekki annað hvort með eða á móti. Þeir eru ekki „við“ og „þið“. Við erum öll í sama liði. Okkur var falið mikilvægt verkefni þar sem hagsmunir þjóðarinnar liggja undir. Ekki hagsmunir stjórnmálaflokkanna eða okkar þingmanna.

Mörg þeirra verkefna sem finna má í stefnuyfirlýsingunni og í þeim þingmálum sem lögð verða fram á vorþinginu eru mál sem allir flokkar lögðu ríka áherslu á í aðdraganda kosninga. Nú mun reyna á það hvort þeim flokkum, sem ekki eiga aðild að núverandi ríkisstjórn, var alvara með þeim yfirlýsingum um að vinnubrögð í stjórnmálum þörfnuðust yfirhalningar.

Þingmenn Bjartrar framtíðar hafa ekki annað í hyggju en að eiga gott samstarf við alla flokka á þingi, hér eftir sem hingað til. Þannig, og bara þannig, getum við fundið bestu mögulegu lausn mála. Það er einlæg von mín að aðrir þingmenn séu sama sinnis.

Ég ætla mér að vinna af heiðarleika í þessu samstarfi þriggja flokka sem myndað hafa meirihluta og samstarfi við þá flokka sem ekki eiga aðild að ríkisstjórn. Ég vil að þjóðin geti treyst mér, ég vil að þjóðin geti treyst valdhöfum og helstu lykilstofnunum samfélagins. Ég vil að menn komi hér hreint fram og tengi sig hagsmunum þjóðarinnar sem kaus okkur til verka.

Þannig og aðeins þannig náum við árangri.

Fylgstu með!

Skráðu þig á póstlistann og fáðu vikulegt fréttabréf sent.