« Tímasetningar vegna atkvæðagreiðslu utan kjörfundar, á sjúkrahúsum, fangelsi og dvalarheimilum aldraðra
Opinn fundur með umhverfisráðherra í Reykjanesbæ »

Björt framtíð lýsir þungum áhyggjum af stöðu lýðræðis í landinu

Birt þann 17.10.17

Björt framtíð fordæmir gríðarlega alvarlegt inngrip í fjórða valdið, starfsemi fjölmiðla og þar með aðhald með stjórnmálunum í tengslum við fréttaflutning Stundarinnar og Reykjavík media.

Björt framtíð lýsir þungum áhyggjum af stöðu lýðræðis í landinu í kjölfar þess að lögbann var sett á fréttaflutning af tengslum stjórnmálafólks og viðskiptalífs, þar sem hindruð hefur verið miðlun upplýsinga er varðar almannahag.

Fyrir réttum mánuði síðan tók stjórn Bjartrar framtíðar ákvörðun um ríkisstjórnarslit, í kjölfar trúnaðarbrests og leyndarhyggju þar sem flokkurinn sem fór með forsætisráðuneytið varð uppvís að eiginhagsmunagæslu á kostnað fólks í viðkvæmri stöðu, þolenda ofbeldis.

Frumvarp Bjartrar framtíðar um vernd uppljóstrara og miðlun upplýsinga, sem lagt var fram á Alþingi veturinn 2014-15, náði illu heilli ekki fram að ganga. Brýnt er að þeir sem uppljóstra um spillingu njóti efnahagslegrar og félagslegrar verndar og verndar gegn málsóknum. Spilling skilgreinist sem misbeiting á opinberu valdi til persónulegs ávinnings. Mikilvægt er að vernda þá sem uppljóstra um misgerðir sem varða almannahag. Björt framtíð mun áfram berjast fyrir því að tryggja vernd uppljóstrara í íslenskum lögum.

Í dag fordæmir Björt framtíð það gríðarlega alvarlega inngrip í fjórða valdið, starfsemi fjölmiðla og þar með aðhald með stjórnmálunum, sem felst í lögbanni því sem sett hefur verið á fréttaflutning fjölmiðlanna Stundarinnar og Reykjavík media um fjárhagsleg og viðskiptaleg hagsmunatengsl stjórnmálamanna sem almenningur á rétt á að vera upplýstur um.

Sérlega alvarlegt hlýtur að teljast að binda hendur fjölmiðla í aðdraganda kosninga til Alþingis, ekki síst í ljósi þess að afleiðingar lögbannsins munu vara fram yfir kosningar.

Fylgstu með!

Skráðu þig á póstlistann og fáðu vikulegt fréttabréf sent.